Dai Shadang Brang Zet  marai Sanit gaw 1958 ning kaw nna Ga hkrun (kata lam) masa hku dip da hkrum nga ai Wunpawng Amyu sha ni hpe hkye mawai hkrang shaw la na matu, ningsang magam lam hpe galaw hpang wa ai gaw, 1961 ning February shata praw (5) ya shani na ninghtoi hta gaw, Wunpawng Amyu sha ni hte Mungdan hpe makawp maga hkrang shaw la na K.I.A. Hpyen Dap ngu ai hpe hpaw ninghtan dat lu let Mungdan ting chyam bra hkra marawn jahtau shabam dat lu sai.

            Dai zawn 1961 Ning hta K.I.A. Hpyen Dap nsen hpung tang she kashaw, lamu she wu kadu re ai shani kaw nna Sinpraw, Sinna, Dingdung, Dingda jut magup de nga ai Amyu hpe tsawra chye ai Wunpawng Ramma mahkawn shabrang ni yawng gaw, Amyu sha ni hpe hkye mawai hkrang shaw la na matu K.I.A. Hpyen Dap de n’sin n’htoi n’hkring n sa yan bang wa masai re.

            Shingre nga ai aten hta Mali Hku Uma, N mai Hku Uma ga hkan na Brang ram hkawn ram ni mung grai yan bu nga ma ai.  N mai Hku Uma ga na yan bu nga ai Brang ram ni kawn, N mai hka hte Ngaw Chyang hka mazup a Sinpraw hkran Chayin Bum lagaw YAJAW hkawng buga na Hkawng Lum the Dau Ze yan mung, Myu tsaw K.I.A. hpyen la la na nga kanu kawa makyin jinghku  ni hpe sha-up kau da hkra rai den yu wa masai, shingrai shan lahkawng gaw 1962 ning shaning ningnan daw hta Wunpawng Mungdan Shanglawt hpyen Dap kaw du nna Ningpawt Ninghpang hpyen hpaji ni hpe sharin awng la n’htawm Myu Tsaw Hpyen La Majing tai wa na mau ai.

            Dai aten hta Man Maw Ginwang kaw masat (1) Dap Dung hpe hpaw shagrin da sai hte Sadung Sama maga de mung Du Kaba ZauTu shi nan woi awn nna Masa (4) Dap Dung hpe bai hpaw masat dat nna, Du Kaba Zau Tu shi nan woi awn let 1963 August shata hta Mali N mai Wa Lawng de shanglawt majen je shang  wa masai.

            1963 Ning May shata hta Hkawng Lum shang lawm ai hpyen hpung ni gaw, Htaw Gaw Lawk Hkawng maga de ningnan Shanglawt majen je lung wa ang ma ai. Dau Ze gaw dai aten hta Du Kaba Zau Tu a Ningtum ma rai nga lu ai. Hkawng Lum yan Dau Ze gaw, rau buga na rai nga ma ai hta n’ga Wunpawng Mungdan Shanglawt Hpyen Dap de mung rau sha shang sa wa ai rai nga ma ai. Grai mung tsawra myit masin machyi hkat chye ai yan rai nga ma ai. Raiyang 1963 ning May shata hta Hkawng Lum gaw, Lawk Hkawng maga lung mat wa ra, Dau Ze gaw Du Kaba Zau Tu hte rau hkawm sa wa ra rai shada n ja n hpra hka garan wa ra rai aten hta Dau Ze gaw shanglawt lu jang Padang manau hta bai hkrum ga nga shakrram ga tsun ai shaloi Hkawng Lum tsun n’htang sharam dat ai ga gaw ning nga ai rai nga ai”DAU ZE E, SHANGLAWT GALOI LU NA KUN I? ngu ai rai nga lu ai.

            Teng sha tsun ga nga yang dai aten hta shanglawt lu na hpe na chying sharawng ai Hkawng Lum gaw 1964 ning August shata hkat Mungkan ningtsan kaw na prat gale mat wa nu ai. Dau Ze mung bungli hte hkawmsa ai ten tai hpyen wa a lata rim hkrum mat ai shiga mawng pru ai kaw na ya aten du hkra shingran pyi n na mat sai

            Ndai labau kadun hta la kap nna shaleng mayu ai gaw, Wunpawng Amyu shai ni dip da hkrum ai kaw na lawt lu na matu 1961 ning kaw nna ru yak tsin yam baw hkum sumhpa hpe hkam let rawt malan hkrun lam kaw tsap wa ai Shaning Mali shi jan rai wa saga ai rai yan, ya aten Awng Dawm Shanglawt garai n lu tim Simsa lam a ningpawt ninghpang kaw du na ching ra sharawng let Shanglawt rawt malan hta shang lawm nna Amyu hte Mungdan a matu Asak ap nawng mat wa sai amyu tsaw mung tsaw share ninghkring ni dai ni Wunpawng Mungdan Simsa wa sai hte rawt jat wa nga sai hpe n lu lawm, n lu mu mat masai. Lama wa asak naw hkrung nga shajang ai rai yang, shanhte ni mung na chying kabu n-gun lu na rai nga ma ai law.

            Mungdan hte Mungan sha ni a matu Asak ap nawng mat wa sai Mung tsaw Myu tsaw share ninghkring myit rum ni hpe myit dum masat masa galaw dat ai law….

                                                                                                                                          Myu Tsaw Dingla

( Wunpawng Mungdan Shanglawt Hpung Ginjaw Ginra Komiti, kaw nna, 2005 Ning hta, lit la shapraw ai, Kang Seng Awng Magazine kaw nna, Sumrai laika ngau hpe, la da ai re lam, laika hti shawa hpe chye sha ngun dat ai.)