Downing Lam, Britisha Hkring Mang Daju Rung De Du Sa Ai Amyu Shayi Ni
KTG(USA)
Myen mung, National League for Democracy (NLD) ningbaw, Daw Aung San Suu Kyi a 63 ning hpring ai shangai nhtoi, June 19 ya shani hta ,England mung kaw nga ai Myen bawsang amyu kaba ni hta na ,shayi marai 5 gaw, Britisha hkring mang daju, Gordon Brown hte , sa du hkrum sha ga ai lam, Burma Campaign UK a shagun shiga hku chye lu ai.
Mr. Gordon Brown hte sa du hkrum shaga ai hta, Myen mung nga amyu sha ni yawng myit hkrum ai hte,Myen hpyen asuya hpe ,ninghkap ai kum la hku nna, Myen mung bawsang amyu kaba rai nga ai, Bama, Karen, Kachin, Karen ni, hte Chin amyu shayi mari 5 ni kaw, Wunpawng amyu sha ni a gawng malai hku nna, Shy. Nang Seng mung lawm ai lam chye lu ai.
Shy. Nang Seng hku nna, Britisha hkring mang daju hte sa du hkrum sha ga ai gaw, ndai lang hte nga yang ,lahkawng lang rai sai hte ,lai wa sai, October, 2007 hta mung, Myen hpung gyi ni hte rau sa du lai wa sai lam mung chye lu ai.
Ndai lang na sa du hkum shaga ai lam ni hta, Aung San Suu Kyi hte ,mung masa a majw,bawng dung hkrum nga ai ni yawng hpe dat ya na lam, Europeon Union (EU) kaw nna, myen mung a ntsa Sanction galaw ai lam hpe grau galaw jat na lam, hte, Myen hpyen dap ni hpe lak nak dut ya ai lam ni pat shingdang ya na matu, Britisha hkring mang daju, Gordon Brown hpe tang madun lai wa sai lam, Shy. Nang Seng kaw nna chye lu ai.
Ndai lang na hkrum zup ai hpawng hta ,Mr. Gordon Brown hte rau, Meg Munn (MP), Glenys Kinnock (MEP) hte ,Ann Clwyd (MP) ni shanglawm ai zawn, Wunpawng Shayi Nang Seng hte rau ,Myen bawsang amyu shayi mari 4, shanglawm bawngban lawm ai lam mung na chye lu ai. Shy. Nang Seng gaw, ya ten hta, Burma Campaign UK a Campaign likhkam bungli hpe gunhpai nga ai zawn, lai wa sai ten ni hta mung, Kachin Women Association of Thailand (KWAT) hta ,shanglawm shamu shamawt lai wa sai myutsaw mungtsaw amyu shayi langai re ai hpe mung BCUK a shagun shiga kaw nna chye lu ai.
Aung San Suu Kyi hpe rim da ai gaw, lai wa sai, 30th May 2003, Depayin shawa sat sharu poi kaba byin ngut ai hpang kaw na rai nna, shi hpe rim da ai aten yawng rai yang 12 ning hte ,239 ya na wa sai rai tim, ya du hkra shi hpe dat ya na masa, Myen hpyen atsuya hta n nga ai zawn, Myen mung a mung masa hkrun lam mung grau sawng ai de man yawng nga ai ten mung rai nga ai.
|
